الصداع التوتري هو أكتر نوع صداع بييجي الناس، وكتير بيبقى زي ألم مستمر أو ضغط حوالين الراس، كأن حد حاطط حزام بيضغط عليها. النوع ده من الصداع ممكن يحصل من وقت للتاني (صداع عرضي) أو يكون مستمر لفترات طويلة (صداع مزمن)، وده ممكن يأثر على حياتك اليومية وشغلك.
يعني إيه صداع توتري؟
الصداع التوتري هو نوع أولي من الصداع، يعني مش بيجي نتيجة مرض تاني. السبب الأساسي ليه أغلب الوقت بيكون زيادة حساسية أعصاب المخ للألم. زمان كانوا بيقولوا إن التوتر العضلي أو النفسي هو السبب، وده صحيح شوية يعني، بس فيه أسباب تانية زي قلة النوم، الإجهاد، أو حتى الجلوس بوضعيات غلط.
أعراض الصداع التوتري:
لما بيحصل الصداع التوتري، بتحس بـ:
- ألم بسيط أو متوسط مع إحساس بضغط حوالين الراس.
- شد أو تيبس في عضلات الرقبة والكتفين.
- حساسية خفيفة للضوء أو الصوت.
- في الحالات اللي بتطول، ممكن تحس بألم مستمر على مدار أيام.
مدة الصداع ممكن تبقى نص ساعة، أو ممكن تمتد لعدة أيام، وعمومًا هو أقل حدة من الصداع النصفي.
الأسباب اللي بتزود احتمالية الصداع :
- إجهاد العين: زي لما تبقى قاعد قدام الكمبيوتر لفترات طويلة من غير راحة.
- شد عضلات الرقبة والكتف: بسبب وضعية جلوس غلط أو نوم على مخدة مش مريحة.
- قلة النوم أو النوم المتقطع: زي في حالات الأرق.
- التوتر أو الاكتئاب: لما تبقى في ضغط نفسي مستمر.
عوامل الخطر:
- الجنس: السيدات أكتر عرضة من الرجاله.
- العمر: أغلب الوقت بيظهر في الأشخاص في الأربعينات من العمر.
تشخيص الصداع التوتري:
لما تروح للدكتور عشان صداع توتري، بيعمل الآتي:
1. يسأل عن التاريخ الطبي: بيكلمك عن الأعراض، بتجيلك كل قد إيه، ومدتها.
2. فحص بدني: عشان يتأكد إن مفيش أسباب خطيرة للصداع.
3. فحوصات إضافية لو لزم الأمر: زي الرنين المغناطيسي أو الأشعة المقطعية لو كان فيه شك في مشكلة تانية.
علاج الصداع التوتري:
1. في حالة الصداع العرضي:
- مسكنات زي الباراسيتامول أو الإيبوبروفين.
- مهم متزودش في استخدام المسكنات عشان متدخلش في صداع بسبب الزيادة في الدوا.
2. في حالة الصداع المزمن:
- مضادات الاكتئاب.
- أدوية مضادة للتشنجات.
علاجات تانية:
- العلاج السلوكي المعرفي: عشان تقلل القلق والتوتر.
- الارتجاع البيولوجي: تقنية بتساعدك تتحكم في عضلاتك وضربات قلبك.
- العلاج الطبيعي: عشان تحسين وضعيتك في الجلوس والنوم.
الوقاية من الصداع التوتري:
- نام كويس وامشي على مواعيد نوم منتظمة.
- العب رياضة بانتظام عشان تحسن الدورة الدموية.
- خد فترات راحة لو قاعد قدام شاشة أو مركز في حاجة لفترة طويلة.
- جرّب تمارين الاسترخاء زي اليوغا أو التأمل.
- اشرب مياه كفاية عشان تتجنب الجفاف.
(محتوى المقال للمعلومات العامة البسيطة و ليس بديل عن زيارة الطبيب و استشارته)
للتفاصيل الكاملة والمزيد من الإرشادات الطبية الدقيقة، ممكن ترجع للمواقع الطبية الموثوقة زي Mayo Clinic، MedlinePlus، وNIH.